Koronavirusnen hastalanğan Ukrainanıñ beşinci prezidenti Petro Poroşenko eki taraflı aqciger yanğısı ile hastahanege alındı, dep bildirdi ömür arqadaşı Marına Poroşenko. Bu aqta Azatlıq Radiosı «Avropa birldemligi» firqasınıñ matbuat hızmeti malümatına esaslanıp bildire.
«Bugün aqayım ve qızımız COVID-19 ile küreşeler. Petro Oleksiyovıç koronavirus hastaları içün Kyiv hastahanelerinden birine alındı. Aqayımnıñ eki taraflı aqciger yanğısı olsa da, küçlü iradesi bar ve onı hastalıq ile küreşinde köstere. Tedaviylev protokolına riayet ete», – dedi Marına Poroşenko.
Sentâbrniñ 29-nda «Avropa birdemligi» firqasınıñ lideri Petro Poroşenko koronavirusqa oğradı, dep bildirdi.
Pandemiya vaqtında Ukrainada 222 322 COVID-19 hastası qayd etildi. 4353 insan vefat etti, 98737 kişi tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
