Dünya sağlıq teşkilâtınıñ fikirince, koronavirus yuqunçınen bağlı vaziyet «ket-kete beterleşe». DST baş müdiri Tedros Gebreyesus, «bir çoq memleket yañlış yolnen ketti», dep tüşüne. Keçirilgen küreş tedbirleri qullanılmağan ya da riayet etilmegen yerlerde hasta sayısı artmağa devam ete, dedi DST yolbaşçısı, dep bildire Azatlıq Radiosı.
Eñ qıyın vaziyet Şimaliy ve Cenübiy Amerikalarda qayd etile. 3,3 million hasta qayd etilgen ABDde soñki vaqıtları tibbiyet hadimleri ve ABD prezidenti Donald Trump arasındaki munasebetlerde kerginlik bar. ABDde koronavirus yuqunçından tasdıqlanğan ölüm sayısı 135 biñ oldı, dep bildire Hopkins University.
Gebreyesus iyülniñ 13-nde Jenevadaki brifingde liderlerniñ şübheli çağıruvları insanlarnıñ pandemiyanı kontrl altına aluv ıntıluvlarına olğan işançını boza, dep bildirdi. Virus birinci duşman ola, amma bazı ükümet ve insanlarnıñ areketlerine baqılsa, bunı aytmaq zor, dep bildirdi DST yolbaşçısı. Mesafe, el yuvma, maska taquv kibi tedbirlerge ciddiy yanaşmalı. Gebreyesus «yaqın kelecekte normal ayatqa qaytmaq mümkün olmaycaq», dep tenbiledi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
