Koronavirus hastalığına oğrağanlarnıñ sayısı 156 oldı (vaqtınca işğal etilgen topraqlar sayılmay), dep bildire Ukraina Sağlıq nazirligi martnıñ 26-nda saba, dep bildire Azatlıq Radiosı.
«Cemaat sağlıq merkeziniñ malümatına köre, martnıñ 26-nda saba saat 10:00-da Ukrainada laboratoriyada tasdıqlanğan 156 COVID-19 hastası qayd etildi, 5 kişi öldi, 1 hasta tüzeldi ve hastahaneden çıqarıldı. Bir kün içinde 43 yañı hasta qayd etildi», – dep aytıla haberde.
Gece yedi yañı hasta Ternopil vilâyetinde, daa dört hasta Çernivtsi vilâyetinde qayd etildi.
«2020 senesi martnıñ 26-nda saba Merkez 183 COVID-19 şübhesi aqqında haber aldı. 2020 senesiniñ başından 1124 COVID-19 şübhesi bar edi», – dep qayd ete nazirlik.
Qırımda koronavirusnen hastalanğan yedi kişi qayd etildi.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
