Ukraina Nazirler şurası koronavirus qırğınlığı sebebinden memlekette qoşma sıñırlavlarnıñ cedvelini tasdıqladı, dep bildirdi baş nazir Denıs Şmıgal. Facebookta derc etilgen video muracaatında aytqanına köre, neticesi müsbet olsa, aprelniñ soñunda sıñırlavlar yımşatılacaq, dep bildire Azatlıq Radiosı.
Aprel 3-niñ sabasına qadar Ukrainada (işğal etilgen Qırım ve Donbas topraqları sayılmay) 942 COVID-19 koronavirus hastası laborator tedqiqlerinden soñ tasdıqlandı, 23 insan vefat etti, 19-ı tüzeldi. Bir künde 138 yañı hasta qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
