Türkiyede epidemiologik vaziyet fenalaşqanı içün aprelniñ 29-ndan mayısnıñ 17-ne qadar tam qapanma olacaq, dep bildire Anadolu haber agentligi Türkiye prezidenti Recep Tayyip Erdoğannıñ video muracaatına esaslanıp, dep haber ete Azatlıq Radiosı.
«Bir cumaaqşamı künü, aprelniñ 29-nda, saat 19:00-dan bazarertesi künü, mayısnıñ 17-si, 5:00-ğa qadar tam qapanmağa keçemiz», – dep ayttı Erdoğan.
Şeerlerarası seyaatlar izinge tabi olacaq, şeerlerarası naqliyatnıñ ise 50%-ı qalacaqtır.
İç işler nazirliginiñ qararına ait olmağan teşkilâtlar işini toqtatacaqtır.
Berilgen malümatqa köre, mekteplerde dersler toqtatıla, imtianlar başqa vaqıtqa qaldırıla.
Zıncır tükânlar bazar künleri qapalı olacaq, qalğan künleri de belli saatlarda çalışacaqtır.
Erdoğan vaziyetni kontrol altına almaq içün ealini qaidelerge riayet etmesine çağırdı.
«Biz hasta sayısını 5000-den az yapmalımız. Aks alda bütün saalarda, turizmden ticaret ve tasilge qadar aqibetlerni körecekmiz», – dep qayd etti Türkiye prezidenti.
Johns Hopkins İnstitutınıñ (ABD) malümatına köre, Türkiye dünyada COVID-19 hastalarınıñ sayısına köre ABD, İndistan, Brazil, Frenkistan ve Rusiyeden soñ kelip, dördünci yerde edi – 4 million 667 000 hastadan çoq. Aynı vaqıtta qayd etilgen vefat sayısına köre Türkiye Ukrainadan artta kele – 38 711 ve 42 950 vefat (Ukraina sağlıq nazirliginiñ malümatı).
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
