Rusiye SİZO-sında ekinci Aqmescit “Hizb ut-Tahrir davası”nıñ iştirakçisi Cemil Gafarovnıñ kamerasını karantinge qapatqanlar. Bu aqta “Qırım birdemligi” tarafından yayınlanğan siyasiy mabüsniñ mektübinde yazıla.
"Dekabrniñ 30 gecesinde taqiqat tevqifhanedeki kameramıznıñ qapusında, iç bir şey añlatmayıp, A4 kâğıttan "KARANTİN" yazısı ile levhanı astılar, amma o vaqıt kameramızda iç kimse hasta degil edi, hastalıqnıñ iç bir alâmetleri de yoq edi. Teftişçilerden sorğan soñ, bir kün evel kameramızdan çıqıp ketkenlerden birisinde COVID-19 qayd etilgeninden haberdar oldıq", – yazdı Gafarov.
Qırımlınıñ sözlerine köre, ekimlerniñ ve idare başlıqlarnıñ izaları olmadan onı ve onıñ kameradaşlarnı, "añlağanımız kibi, eki afta müddetine karantinge qapattılar". Gafarov tarif etkeni kibi, bu müddet içinde kameradan kimse bir yerge çıqmay – ne mahkemelerge, ne kezintige, ne de advokatnen körüşüvlerge. Yemeklerni Gafarov ve onıñ kamerasından başqa mabyüsler pencereden alalar.
Daa qayd etkeni kibi, bunen beraber, etraf müitten ayırılğanlarnıñ ne tibbiy teşkerüvi, ne de ilâclarnen temin etüvi bar.
Qırımnıñ Yuqarı makemesi ekinci Aqmescit "Hizb ut-Tahrir davasınıñ" iştirakçisi Cemil Gafarovğa 2021 senesi yanvarnıñ 14 qadar apis cezasını uzattı.
Daa evel Gafarovnıñ advokatı Rifat Yahin müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı. Advokat, müvekkiliniñ tibbiy tedqiqlerine dair arizanı Aqmescit SİZOsınıñ memuriyetine berdi.
«Memorial» Rusiye aq qorçalayıcı merkezi Cemil Gafarovnı siyasiy mabüs dep tanıdı.
58 yaşında Cemil Gafarov 2019 senesi martnıñ 27-nden berli terrorizmden şübheli olğanı içün SİZOda tutula. Onı Rusiyede ve işğal etilgen Qırımda yasaqlanğan «Hizb ut-Tahrir» firqasında iştirak etkeninde qabaatlaylar. Gafarovnıñ ekinci derece saqatlığı bar.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
