Rusiye nezaretindeki Aqmescit şeer ükümeti başınıñ müavini, tasil bölüginiñ reberi Tatyana Suhina, ocalarında COVID-19 tasdıqlanğanından sebep şeer mektepleriniñ üç sınıfı distantsion tasilge kecirilgenini bildirdi.
"Üç mektepte birer sınıf qapaldı: 21-incide, 44-üncide ce 1-inci litseyde. Başlanğıç sınıflar. Çunki ocaları COVID testini yaptı, test hastalıqnı kösterdi, bunıñ içün Rospotrebnadzor qararı bar", - haber etti "Krıminform"ğa Suhina.
Onıñ aytqanına köre, balalar eki afta devamında mekteplerge barmaycaq, distantsion şekilde oquycaq.
Tünevin Qırımda 70 koronavirus hastası qayd etildi.
Umumen Qırımda, akimiyetniñ malümatına köre, 3080 yañı koronavirus hastası qayd etildi, 93-ü çetelden keldi, 124-ü qomşu Rusiyeden kelgenler ve olarnen alâqada olğanlar. 2000 insan tüzeldi, 36 hasta koronavirustan vefat etti. Aqyarda 591 adam hastalandı, 448 - yahşı oldı, 20 adam vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
