Rusiyede belli iş saalarınıñ saipleri koronavirus aşısını yaptırmağa istemegen hadimlerni aylığını bermeyip işten çıqarmağa mecbur olacaq. Tibbiy sebeplerden aşı olamağan hadimler istisna olacaq. Bu aqta «İzvestiya» Rusiye neşiri Rostrudnıñ «Korporativ uquqçılar birleşmesine» bergen cevabına esaslanıp yaza.
Rostrud böyle tedbirler Emek kodeksinde ve «Yuqunç hastalıqlarnıñ immunitet profilaktikası» qanunıda bar, dep bildire Azatlıq Radiosı.
Hadim aşıdan vazgeçse, yazma şekilde bildirmeli. Soñra iş bergen kişi işten çıqarıluvına dair buyruq azırlay. Uzaqtan işke keçüv uzaqlaştıruvnıñ alternativası olmay, dep añlata müessise. Evden çalışqan hadimler de aşı olmalı.
Vesiqağa köre, işten uzaqlaştıruv künü regionda aşılav müddetlerine bağlı. Meselâ, Moskvada cemaat aşağan yerlerniñ ve hızmet saasınıñ hadimleri avgustnıñ 15-ne qadar bütünley aşılanmalı.
- Yazda Rusiyede yañı COVID-19 tez tarqaluvı qayd etilip başlandı.
- Rusiyede vaktsinatsiya 2020 senesiniñ soñunda başlandı. Yerli aşı qullanıla. Soñki malümatqa köre, aşınıñ bir dozasını ealiniñ 20 fayızı aldı. Memleket ealisiniñ 13 fayızından çoqu bütünley aşılandı.
- Koronavirus pandemiyası başlağanından berli Rusiyede, resmiy malümatqa köre, beş buçuq milliondan çoq COVID-19 hastası qayd etildi. 145 biñden çoq hasta vefat etti.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
