Rusiye kontrolindeki Qırım sağlıq naziri İgor Çemodanov, qırımlı tibbiyet hadimlerine koronavirus hastalarınen çalışqanları içün 59 mln rubleden çoq qoşum yapıldı, dep işandıra.
Bu aqta o, mayısnıñ 26-nda Aqmescitteki matbuat konferentsiyasında ayttı.
Onıñ bildirgenine köre, tibbiyet hadimlerinden vade etilgen qoşum alamağanlarına dair çoq haber kele.
«778 insan federal subsidiyalardan 13 mln 370 biñ ruble miqdarında stimul ödemelerini aldı. 448 qarar esasında 443 insan 23 million 348 biñ ruble miqdarında para aldı, subyekt qararımız esasında 1745 insan 25 mln 575 biñ rubde miqdarında para aldı. Ödemelerniñ umumiy sayısı 59,1 mln ruble oldı», – dep tarif etti Çemodanov.
Qırımda ekimler koronavirus hastalarınen çalışqanları içün qoşum para alamağanını şikâyet ete ve akimiyetke video vastasınen muracaat ete. Rusiye Tahqiqat komiteti tibbiyet hadimlerine berilmegen paranen bağlı teşkerüv başlattı.
Qırımda keçken künü üç yañı koronavirus hastası qayd etildi.
Böylece, Qırımda 349 koronavirus hastası qayd etildi. 26-sı çetelden keldi, 73-ü – 154 insan tüzeldi. Rusiyeden kelgen ve olarnen alâqada olğanlar. 11 koronavirus hastası vefat etti. Aqyarda – 157 hasta, üçü vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
