Keçken künü Qırımda 86 yañı koronavirus hastası qayd etildi, 8-iniñ hastalıq alâmetleri yoq, dep bildire Qırımnıñ Rusiye yolbaşçısı Sergey Aksenov.
«59 hasta tibbiy yardım içün muracaat etkende qayd etildi, 27 kişi daa evel qayd etilgen hastalarnen alâqada oldı. Bir künde 15 kişi tüzeldi, bütün müddet devamında 31 004 insan yahşı oldı», – dep bildire aytqanlarını Qırım ükümetiniñ matbuat hızmeti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
