Qırımda keçken künü 15 insan COVID-19-dan vefat etti, bir kün evelsi Qırımnıñ sağlıq nazirligi derc etken raqamlar daa az edi.
Umumen pandemiya vaqtında, müessise mmalümatına köre, Qırımda 2196 hasta koronavirustan vefat etti.
«4897 insan (COVID) ambulator tedaviylevde, 2731 kişi (COVID ve pnevmoniya) hastahanede buluna», – dep aytıla haberde.
Bunıñnen beraber Qırımda bir künde qayd etilgen COVID-19 hastalarınıñ sayısı eksildi – avgustnıñ 31-nde saba 281 yañı koronavirus hastası qayd etildi, bir kün evelsi 17 hasta çoq edi.
«255 hasta tibbiy yardım içün muracaat etkende qayd etildi, 26-sı daa evel qayd etilgen hastalarnen alâqada oldı. Bir künde 444 insan tüzeldi, bütün müddet devamında 60 535 kişi yahşı oldı», – dep aytıla Qırımnıñ Rusiye yolbaşçısı Sergey Aksenovnıñ haberinde.
Hatırlatamız, avgustnıñ 30-nda Qırımda akimiyet bir künde 298 COVID-19 hastası qayd etildi, dep bildirdi.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya avgustnıñ 11-nde COVID-19-dan vefat etkenlerniñ sayısı rekord oldı, dep bildirgen edi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
