Qırımda bir künde qayd etilgen COVID-19 hastalarınıñ sayısı eksile – dekabrniñ 1-nde saba 439 yañı koronavirus hastası qayd etildi, tünevinden daa üç hasta az. Bu aqta Rusiye kontrolindeki Qırım sağlıq nazirligi bildire.
Müessise malümatına köre, bir künde 24 insan koronavirus yuqunçından vefat etti.
«Umumen (pandemiya vaqtında – QA) 119 908 COVID-19 hastası qayd etildi. Bir künde 873 insan yahşı oldı, bütün müddet devamında 108 431 kişi tüzeldi», – dep aytıla haberde.
Hatırlatamız, bir kün evelsi 441 koronavirus hastası qayd etildi. Qırımnıñ Sağlıq nazirligi malümatına köre, bir kün evelsi 25 insan COVID-19-dan vefat etti.
Oktâbrniñ 20-nde yarımadada koronavirus ile küreş tedbirleri quvetleştirildi. Bundan evel Qırımda koronavirus pandemiyası sebebinden ilân etilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları kirsetildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
