Qırımda keçken künü 24 hasta koronavirustan vefat etti, bu pandemiya vaqtında bir künde vefat etkenlerniñ yañı rekordı ola. Bunı noyabrniñ 23-nde saba Qırımnıñ Rusiye sağlıq nazirligi derc ete.
Pandemiya vaqtında Qırımda 3442 insan koronavirustan vefat etti. Soñki sefer noyabrniñ 18-nde bir künde bu yuqunçtan vefat etkenlerniñ eq büyük sayısı (23) qayd etilgen edi.
Qırımda koronavirus hastalarınıñ sayısı eksile – bir kün evelsi qayd etilgen 814 hasta yerine 775 kişi hastalandı.
«Umumen 115 491 COVID-19 hastası qayd etildi. Bir künde tüzelgenlerniñ sayısı 773 ola, bütün müddet devamında 103 162 kişi tüzeldi», – dep aytıla Qırım Sağlıq nazirliginiñ malümatında.
Oktâbrniñ 20-nde yarımadada koronavirus ile küreş tedbirleri quvetleştirildi.
Bundan evel Qırımda koronavirus pandemiyası sebebinden ilân etilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları kirsetildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
