Qırımda keçken künü 814 koronavirus hastası qayd etildi, bir kün evelsi yerli akimiyet derc etken raqam daa yüksek edi. 20 COVID-19 hastası vefat etti, pandemiya devamında 3418 kişi keçindi. Bu stastikanı noyabrniñ 22-nde Qırımnıñ Rusiye sağlıq nazirligi derc ete.
Müessiseniñ malümatına köre, umumen pandemiya vaqtında Qırımda 114 716 COVID-19 hastası qayd etildi.
«Bir künde 811 insan yahşı oldı, bütün müddet devamında 102 389 kişi tüzeldi», – dep aytıla haberde.
Tünevin 884 koronavirus hastası aqqında haber etildi, bu raqam da bir kün evelsi derc etilgen raqamdan az edi. 24 koronavirus hastası vefat etti.
Oktâbrniñ 20-nde yarımadada koronavirus ile küreş tedbirleri quvetleştirildi.
Bundan evel Qırımda koronavirus pandemiyası sebebinden ilân etilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları kirsetildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
