Qırımda keçken künü 267 yañı koronavirus hastası qayd etildi, bir kün evelsi hastalarnıñ sayısı daa az edi. Bu aqta Qırımnıñ Rusiye yolbaşçısı Sergey Aksenov Facebookta bildirdi.
«Sentâbrniñ 19-nda Qırım Cumhuriyetinde 267 yañı koronavirus hastası qayd etildi. 199 hasta tibbiy yardım içün muracaat etkende qayd etildi, 68 kişi daa evel qayd etilgen hastalarnen alâqada olğan edi», – dep bildirdi o.
Rusiye kontrolindeki Qırım sağlıq nazirliginiñ malümatına köre, soñki künde daa 8 hasta COVID-19-dan vefat etti. Pandemiya vaqtında 2460 Qırım sakini vefat etti.
Bir künde 64 insan tüzeldi, bütün müddet devamında 65322 kişi yahşı oldı.
Qırımda keçken aftanıñ ortasından berli koronavirus hastalarınıñ sayısı arta.
Qırım ve Aqyardaki Rospotrebnadzor idaresi Qırımnıñ bir sıra rayonında koronavirus vaziyeti fenalaştı, dep bildirdi. Müessise, Qırımda dördünci koronavirus dalğası beklenile, lâkin qırımlılar daa az aşı olmağa başladı, dep qayd etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
