Qırımda akimiyet bir künde qayd etilgen COVID-19 sayısında rekord qayd etmege devam ete – oktâbrniñ 15-nde saba 568 yañı hasta qayd etildi, bir kün evelsi qayd etilgen rekorddan 16 insan çoq, dep bildire Qırımnıñ Rusiye sağlıq nazirliginiñ matbuat hızmeti.
«Umumen 86 481 COVID-19 hastası qayd etildi. Bir künde 668 insan yahşı oldı, bütün müddet devamında 73 433 kişi tüzeldi», – dep aytıla haberde.
Bundan ğayrı, müessise malümatına köre, keçken künü 16 insan koronavirus yuqunçından vefat etti.
Hatırlatamız, Qırım akimiyeti bir künde qayd etilgen yañı rekord aqqında bildirgen edi – oktâbrniñ 13-nde 55 yañı koronavirus hastası qayd etildi.
Oktâbrniñ 14-nde Rusiye kontrolindeki Qırım baş nazir muaivni, emek ve içtimaiy qoruv naziri Yelena Romanovskaya yarımada hastahanelerinde koronavirus hastaları içün yerlerniñ 88%-ı tolu, dep bildirdi.
Rusiye kontrolindeki Qırım ükümetiniñ reisi Yuriy Gotsanük Qırımda aşı olğan sakinler içün QR-kod sistemasınıñ kirsetile bile, Qırım yarımadasında tam qapanuv olacağını «şimdilik beklemeñiz», dep ayttı.
Qırımda koronavirus pandemiyası sebebinden kirsetilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları işke tüşürildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
