Qırım yarımadasında «Delta» ind ştammı faal tarqala, dep bildirdi iyülniñ 7-nde Qırım ve Aqyardaki Rospotrebnadzor idaresiniñ yolbaşçısı Natalya Penkovskaya COVID-19 ile küreş operativ ştabınıñ oturışuvında.
«Diqqatıñıznı celp etmege ister edim, Qırımda olğan ştammlar arasında eñ çoq ind ştammı qayd etile», – dedi Penkovskaya.
Qırım sağlıq nazirliginiñ malümatına köre, keçken künü yedi hasta koronavirustan vefat etti, umumen pandemiya vaqtında 1559 kişi keçindi. Bir künde Qırımda 335 COVID-19 hastası qayd etildi.
Penkovskaya, keçken afta koronavirus yuqunçından vefat etkenlerniñ sayısında antirekord oldı, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
