İyülniñ 1-den Qırımda 65 yaşından büyük olğan insanlarğa cemaat naqliyatınen qatnavnı yasaq etecek olalar. Bunı Qırımnıñ Nazirler şurasınıñ reis muavini, emek ve içtimaiy qoruv naziri Yelena Romanovskaya teklif etti.
«65 yaşından büyük olğan insanlarğa cemaat naqliyatınen qatnavnı sıñırlamağa teklif etem. Cemaat naqliyatınen bedava qatnağanlarğa aşı yapmağa imkân bermek içün, sıñırlavnı iyülniñ 1-nden tayin etmege teklif etem», – «Krım24» Romanovskayanıñ aytqanlarından alıntı ketire.
Onıñ aytqanına köre, şimdi aşı yapqanlarnı közetmek mümkün, olarnıñ kartları blok etilmeycek.
«Kurort şeerlerinde marşrutkalar ağzı burnunen tolu olğanını köremiz», – dep qayd etti o.
İyünniñ 16-nda Qırım ve Aqyardaki Rospotrebnadzor idaresiniñ yolbaşçı muavini Dmitriy Krutikov er aftalıq brifing vaqtında soñki afta Qırımda koronavirus hastalarınıñ sayısı 16% arttı, dep bildirdi. Eñ çoq hasta Yaltada qayd etildi, soñki üç aftada yañı COVID-19 hastalarınıñ sayısı 74% oldı.
Aynı brifingde Qırım sağlıq naziri Aleksandr Ostapenko ealini aşılav planınıñ tek 29%-ı yerine ketirildi, dep haber etti.
Regionda maska taquv rejimi ve mesafege riayet etilmese, hasta sayısı ise eksilmeyip artsa, Rospotrebnadzor Qırımnıñ koronavirus ile küreş operativ ştabına COVID-19 pandemiyası sebebinden kirsetilgen sıñırlavlarnı sertleştirmege teklif etecek ola.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
