İşğal etilgen Qırımda koronavirus telükesi sebebinden 3837 insan tibbiy közetüv altında buluna, soñki künde 374 kişi közetüv altına alındı. Bu aqta Qırımnıñ Rusiye sağlıq nazirligi bildire.
«2755 insan evde dinamik közetüv altında, 302 insan hastahanede buluna, 780 kişi observatorlarğa alındı. 182 insan tibbiy müessiselerde tedaviylene, 478 kişi yahşı olıp çıqarıldı», – dep aytıla müessise haberinde.
Soñki künde işğal etilgen Qırımda dört yañı koronavirus hastası qayd etildi. Yerli akimiyetniñ malümatına köre, umumen Qırımda 685 yañı koronavirus hastası qayd etildi. 36-sı çetelden keldi, 94-ü qomşu Rusiyeden kelgenler ve olarnen alâqada olğanlar. 478 insan yahşı oldı, 25 kişi vefat etti. Aqyarda 229 insan yañı koronavirus yuqunçına oğradı, dört kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
