Qırımda keçken künü 9 hasta koronavirus yuqunçından vefat etti, dep aytıla Qırımnıñ Rusiye sağlıq nazirliginiñ er künlik monitoring malümatında. Bu malümatqa köre, Qırımda pandemiya vaqtında bu yuqunçtan vefat etkenlerniñ sayısı 574 oldı.
«3569 kişi (COVID) ambulator tedaviylevde buluna, 3145 kişi (COVID ve pnevmoniya) hastahanede buluna, 3 insan observatorlarğa alındı. Umumen 27164 COVID-19 hastası qayd etildi. Tüzelgen 21354 kişi yiberildi», – dep aytıla müessise haberinde.
Qırım ve Aqyardaki Rospotrebnadzor idaresi soñki vaqıtları yarımadada koronavirus yuqunçından vefat etken hastalarnıñ sayısı arta, dep qayd ete.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
