Mayısnıñ 7-nde Qırımda beş hasta koronavirus yuqunçından öldi, dep yazıla Qırımnıñ Rusiye sağlıq saqlav nazirliginiñ er künlik monitoring malümatında.
«505 insan (COVID-19) ambulator tedaviylevde buluna, 1518 kişi (COVID-19 ve pnevmoniya) hastahanede yata», – dep aytıla haberde.
Berilgen malümatqa köre, umumen 41 273 COVID-19 hastası qayd etildi, 38 194 tedaviylendi.
Tünevin Qırımda 104 yañı koronavirus hastası qayd etildi, 4-niñ hastalıq alâmetleri yoq edi. Bu aqta Qırımnıñ Rusiye başı Sergey Aksönov bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
