Qırımda keçken künü 382 yañı koronavirus hastası qayd etildi, 12 hasta COVID-19-dan vefat etti. Bu aqta Rusiye kontrolindeki Qırım sağlıq nazirligi bildire.
«348 hasta tibbiy yardım içün muracaat etkende qayd etildi, 33 insan daa evel qayd etilgen hastalarnen alâqada oldı, bir hasta çetelden keldi», – dep aytıla haberde.
Bu malümatqa köre, Qırımda 3 822 insannıñ koronavirus tedqiqi yapıldı. Bir künde 58 insan yahşı oldı.
Qırımnıñ operativ ştab malümatına köre, umumen pandemiya başlağanından 64 biñden çoq hasta qayd etildi, tahminen 55 biñ insan tüzeldi, tahminen 1,9 biñ hasta vefat etti.
Avgustnıñ 14-nde Qırımda 387 yañı koronavirus hastası qayd etildi, 12 kişi vefat etti. Avgustnıñ 13-nde Qırımda 389 hasta qayd etildi. Avgustnıñ 12-nde qayd etilgen 390 hasta aqqında haber etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
