Bir künde Qırımda beş insan koronavirustan vefat etti, dep bildirdi Rusiye kontrolindeki Qırım sağlıq nazirliginiñ matbuat hızmeti.
«Qırım Cumhuriyetinde yañı koronavirus yuqunçı vaziyetini monitoring malümatına köre, 99 insan (COVID) ambulator tedaviylevde, 1549 kişi (COVID ve pnevmoniya) hastahanede buluna», – dep aytıla haberde.
Qayd etilgenine köre, pandemiya vaqtında yarımadada 42 642 COVID-19 hastası qayd etildi, yahşı olğan 39 800 insan hastahaneden çıqarıldı.
Mayısnıñ 22-nde Qırımnıñ Rusiye yolbaşçısı Sergey Aksenov Qırımda 91 koronavirus hastası qayd etildi, sekiziniñ hastalıq alâmetleri yoq, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
