Qırımda mayısnıñ 30-nda 97 yañı koronavirus hastası qayd etildi, 5-iniñ hastalıq alâmetleri yoq. Bu aqta Kreml kontrolindeki Qırım yolbaşçısı Sergey Aksenov Facebook saifesinde bildirdi.
Onıñ malümatına köre, 76 hasta tibbiy yardım içün muracaat etkende qayd etildi, 20 kişi daa evel qayd etilgen hastalarnen alâqada oldı, 1 hasta çetelden keldi.
«Bir künde tüzelgenlerniñ sayısı 16 oldı, bütün müddet devamında 40 464 insan yahşı oldı», – dep yazdı Aksenov.
Hatırlatamız, keçken afta Qırımda koronavirus pandemiyası sebebinden eglence merkezleri, teatr ve kinoteatrlerde kirsetilgen sıñırlavlar iyülniñ 1-ne qadar uzatıldı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
