Aprelniñ 9-nda Qırımda 3139 insan koronavirus sebebinden tibbiy közetüv altında buluna, olardan 405-i soñki künde qoşuldı.
Bu aqta Rusiye kontrolindeki Qırımnıñ sağlıq naziri İgor Çemodanov koronavirus tarqaluvına qarşı operativ ştabınıñ toplaşuvında ayttı.
«Ermeni Bazardaki vaziyetni köz ögüne alıp, tünevin daa 305 insan közetüv altına alındı. Qırımda 405 kişi közetüvge alındı ve bugünki künde 3139 insan közetüv altında qala, olardan 2944-ü evde dinamik közetüv altında buluna. Umumen 26 insannıñ COVID-19 testi müsbet çıqtı, sekiz kişi tüzelip hastahaneden çıqtı, 18-i tedaviylene. Ağır hastalar yoq», – dep bildirdi o.
Qırımnıñ Rusiye Sağlıq nazirliginiñ malümatına köre, 52 insan hastahanede, 143 kişi observatorlarda buluna.
Qırımda 36 yañı koronavirus hastası qayd etildi. 20-si ketirildi, altısı üç qorantadan yerli ola. Yedi insan tüzelip, yuqunç hastahanesinden çıqarıldı. Aqyarda beş koronavirus hastası aqqında haber etilgen edi, dördü tedaviylendi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
