Rusiye kontrolindeki Qırım yolbaşçısı Sergey Aksenov yarımada şeerleri ve rayonlarında mecburiy maska taquv rejimini daa çoq kontrol etmege emir berdi.
«İşdeşlerim, men eki afta evelsi er kes maska taqqanını körgen edi. Şimdi intizam yımşadı. Er kesniñ eksikligi. Maska rejimi üzerindeki belediye kontrolini aytsaq, işimizni quvetleştirecekmiz, söz berem», – dedi Aksenov dekabrniñ 2-nde koronavirus yuqunçınıñ tarqaluvı ile küreş operativ ştabınıñ toplaşuvında.
Oktâbrniñ başında Qırım akimiyeti cemaat naqliyatında maska rejimi quvetleştirilgenini bildirdi ve cemaat naqliyatında ve tükânlarda maska taqmağan yolcularğa ve alıcılarğa hızmet köstermege yasaqladı.
Keçken künü Qırımda 233 koronavirus hastası qayd etildi. Umumen pandemiya vaqtında 15819 COVID-19 hastası qayd etildi, tüzelgen 11907 insan hastahaneden çıqarıldı, 299 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
