Qırımnıñ Rusiye yolbaşçısı Sergey Aksenovnıñ bildirgenine köre, daa evel food courtlarnıñ işi içün koronavirus pandemiyası sebebinden kirsetilgen sıñırlavlar yanvarniñ 15-nde lâğu etile.
«Müessiselerniñ iş sıñırlavları aqqında – yanvarniñ 15-nden itibaren food courtlar çalışıp başlaycaq. İş saatınen bağlı sıñırlavlar lâğu etile. Adiy rejimde çalışacaqmız. Lâkin, Rospotrebnadzor talapları lâğu etilmey – masalar arasında mesafe, maska taquv rejimi, dezinfektsiya – bular qala», – dedi Aksenov yanvarniñ 13-nde COVID-19 ile küreş operativ ştabınıñ toplaşuvında.
2020 senesi dekabrniñ 24-nde Aksenov çıqarğan buyruğınen Qırımnıñ alış-veriş merkezlerinde kütleviy tedbirlerniñ keçirilüvini ve food courtlarnıñ işini yanvarniñ ortasına qadar yasaqladı.
Dekabrniñ 25-nde Aqmescit alış-veriş merkezlerindeki food courtlar formatında aş yerleri skotçnen sarıldı.
Keçken künü Qırımda 213 koronavirus hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
