Aqyarda fevralniñ 3-nde saba 101 yañı COVID-19 hastası qayd etildi. Umumen pandemiya vaqtında Aqyarda 10005 kişi yañı koronavirus yuqunçına oğradı, 404 insan vefat etti, dep haber ete şeerniñ Rusiye ükümetiniñ matbuat hızmeti.
«Bir künde 118 insan tüzelgen soñ yiberildi, 69 yaştan 92 yaşqa qadar dört kişi vefat etti. Umumen Aqyarda 8952 kişi yahşı oldı. Bugünki künde COVID-19 tasdıqlanğan 424 kişi hastahanelerde buluna. Alı ağır olmağan hastalar bölüginde 91 kişi yata», – dep aytıla haberde.
Akimiyetniñ malümatına köre, 609 insan közetile. 2050 kişige COVID-19 aşısı yapıldı, 833 kişi ekinci etaptan keçti, şimdi oca ve tibbiyet hadimlerine aşı yapıla.
Keçken künü Qırımda 151 yañı koronavirus hastası qayd etildi. Pandemiya vaqtında 32832 COVID-19 hastası qayd etildi, tüzelgen 27719 insan yiberildi, 783 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
