Aqyarda iyünniñ 7-nde 24 yañı COVID-19 hastası qayd etildi, tüzelgen eki insan hastahaneden çıqarıldı, 83 yaşında bir hasta vefat etti, dep haber ete şeerniñ Rusiye ükümeti.
«Umumen Aqyarda 15 111 insan yañı koronavirus yuqunçına oğradı. 13 793 insan tüzeldi, 694 kişi vefat etti. 263 insan közetile – bu insanlar hastalarnen alâqada oldı, COVID-19 diagnozları tasdıqlanmadı», – dep aytıla akimiyet haberinde.
Keçken künü Qırımda, yerli akimiyetniñ malümatına köre, 108 koronavirus hastası qayd etildi, üç hasta vefat etti. Umumen pandemiya vaqtında 44212 insan hastalandı, yahşı olğan 40996 insan hastahaneden çıqarıldı, 1386 hasta vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
