COVID-19 hastalarınıñ sayısı 3 millionnı aştı, dep bildirdi Johns Hopkins Universiteti Sistem tedqiqatlar merkezi, dep haber ete Azatlıq Radiosı.
Hastalıq 208 131 insannıñ vefatına sebep oldı. 878 813 kişi tüzelip yahşı oldı.
Eñ çoq hasta Amerika Birleşken Devletlerinde (aman-aman 973 biñ), İspaniyada (tahminen 230 biñ) ve İtaliyada (tahminen 200 biñ) qayd etildi.
Ukrainada 9 biñden çoq COVID-19 hastası qayd etildi. 220 insan vefat etti, 864 kişi tüzeldi.
İşğal etilgen Aqyarda aprelniñ 27-nde beş yañı koronavirus hastası qayd etildi. Aprelniñ 27-nde saba Qırımda bir koronavirus hastası qayd etildi – İslâm Terek rayonınıñ tibbiyet hadimidir.
Al-azırda Qırımda 70 koronavirus hastası bar. Aqyarda, soñki malümatqa köre, 31 COVID-19 hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
