Link açıqlığı

Saatnıñ esas haberi

COVID-19 hastalığına oğrağan qadın balasına yuqturdı – Aksenov


Qırımda keçken künü daa bir koronavirus hastası qayd etildi – Qurman rayonında 11 yaşında bala hastalandı.

Bu aqta aprelniñ 21-nde Rusiye kontrolindeki Qırım yolbaşçısı Sergey Aksenov COVID-19 tarqaluvına qarşı operativ ştab toplaşuvında bildirdi.

«Daa bir hastamız bar – Qurman rayonında qorantada hastalanğan 11 yaşında bala. Alâqada olğan insanlar belli. Anası boksqa alınğan edi», – dedi o.

Bu malümatnı Qırım ve Aqyardaki Rospotrebnadzor idaresiniñ yolbaşçı muavini Dmitriy Krutikov tasdıqladı.

«Anasınıñ koronavirus yuqunçı qayd etilgen edi, bu bala yaqından alâqada oldı. Anası izolâtsiyağa alındı. Keskin nefes virus yuqunçı alâmetleri bar edi, talili alındı ve koronavirus qayd etildi. Bala cumhuriyetniñ yuqunç hastahanesinde buluna. Alâqada olğan 10 insan bar, üçü izolâtorda, ekisi hastahanede buluna. Beş kişi özüni izolâtsiya etti. Qorantada iş devam ete», – dep bildirdi o.

Qırımnıñ Rusiye Sağlıq nazirliginiñ malümatına köre, umumen Qırımda 46 COVID-19 hastası bar, 23-ü hastahaneden çıqarıldı, 23-ü tedaviylenmege devam ete. Aprelniñ 20-ne qadar Aqyarda 18 koronavirus hastası qayd etildi.

«Qırım aq qorçalayıcı gruppası» bildirgenine köre, aprelniñ 13-nden 19-na qadar işğal etilgen Qırımda ve Aqyarda resmiy şekilde qayd etilgen COVID-19 hastalarınıñs ayısı aman-aman eki qat arttı. Aq qorçalayıcılar, monitoring vaqtında elde etilgen malümat Rusiye akimiyeti derc etken resmiy raqamlarnıñ kerçek olmağanını köstere, dep bildire.

Ukraina reintegratsiya nazirligi, işğal etilgen Qırımda ve Donetsk ve Lugansk vilâyetleriniñ ayrı rayonlarında COVID-19 aqqında malümat derc etilgen soñ olarnıñ saytı Rusiyede blok etildi, dep bildirdi.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG