Keçken künü Qırımda koronavirus hastalarınıñ sayısı arttı. Sentâbrniñ 13-nde saba 233 yañı COVID-19 hastası qayd etildi, bir kün evelsi üç hasta çoq edi.
Bu aqta Qırımnıñ Rusiye yolbaşçısı Sergey Aksenov içtimaiy ağlardaki saifelerinde haber etti.
«204 hasta tibbiy yardım içün muracaat etkende qayd etildi, 29 kişi daa evel qayd etilgen hastalarnen alâqada oldı. Bir künde 38 insan tüzeldi, bütün müddet devamında 63739 insan yahşı oldı», – dep yazdı Aksenov.
Qırımnıñ Rusiye sağlıq nazirliginiñ malümatına köre, keçken künü üç insan COVID-19-dan vefat etti, sentâbrniñ 12-nde saba vefat etkenlerniñ sayısı doquz kişi az edi.
Hatırlatamız, Qırımda 230 yañı COVID-19 hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
