Aprelniñ 4-ü sabasına qadar dünyada qayd etilgen koronavirus hastalarınıñ sayısı 1 mln 100 biñden çoq oldı. Bu aqta Johns Hopkins universiteti yanındaki Sistem tedqiqleri merkeziniñ malümatında aytıla. COVID-19 hastalığından 58929 insan vefat etti, 226 669 kişi tüzeldi, dep haber ete Azatlıq Radiosı.
Ukrainada aprelniñ 3-nde aqşamğa qadar 1072 hasta qayd etildi, 27 insan vefat etti, 22 kişi tüzeldi. Rusiyede koronavirus hastalarınıñ sayısı 4149-ğa qadar arttı. Aprelniñ 3-ne qadar 32 Rusiye regionında 601 yañı hasta qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
