Kreml kontrolindeki işğal etilgen Aqyar ükümeti bir künde 4 yañı koronavirus hastası qayd etildi, dep bildire. Hastalanğanlar arasında 86 yaşında er adam bar.
«Avgustnıñ 24-nde saba dört yañı COVID-19 hastası qayd etildi. Hastalanğanlar arasında 52 yaşında qadın ve 72 yaşından 86 yaşına qadar üç er adam bar. Yahşı olğan daa beş kişi hastahaneden çıqarıldı. Umumen yılnıñ başından Aqyarda 468 insan yañı koronavirus yuqunçına oğradı», – dep aytıla haberde.
Derc etilgen malümatqa köre, al-azırda 74 insan Aqyar hastahanelerinde buluna. 363 insan tüzeldi, 15 kişi vefat etti.
«Bugünki künde 170 insan yuqunç hastahanesinde, 140 kişi №9 şeer hastahanesinde közetile. 161 insan yaşağan yerinde közetile. «İzumrud» ve «Solnışko» pansionatları observator rejiminde çalışa», – dep aytıla haberde.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
