Bağçasaraydaki loqsahane vaqtınca çalışmay, dep bildirdi Rusiye kontrolindeki Qırım ükümetiniñ sağlıq naziriniñ muavini Anton Lâskovskiy. Onıñ malümatına köre, qadınlar Aqmescit loqsahanelerine yollanıla.
«Loqsahane işini toqtattı. Doğuruvları çoq degil edi. Aynı rayonda covid hastahanesi çalışqanına baqıp, loqsalarnı Aqmescitke yollamağa qarar alındı. Qorqunç bir şey yoq. Ağır ayaqlı ve loqsalarnıñ sağlığını tüşünemiz», – dedi Lâskovskiy «Krıminform» neşirine.
Qırım akimiyetiniñ bildirgenine köre, Bağçasaray merkeziy rayon hastahanesinde koronavirus hastalarını tedaviylemek içün gospital açıldı.
Qırımda oktâbrniñ 2-nde 100 yañı koronavirus hastası qayd etildi. Bir hasta vefat etti. Umumen, yerli akimiyetniñ malümatına köre, Qırımda 4855 yañı koronavirus hastası qayd etildi. 69 kişi koronavirustan vefat etti. Aqyarda yılnıñ başından 1084 insan yañı koronavirus yuqunçına oğradı, 26-sı soñki künde hastalandı.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
