Aqyarda keçken künü 61 yañı koronavirus hastası qayd etildi. 66 yaşından 95 yaşına qadar 5 hasta öldi. Bunı şeerniñ Rusiye ükümeti bildirmekte.
Berilgen malümatqa köre, 25 adam tüzelgen soñ hastahaneden çıqarılğan. Pandemiya başlanğandan berli Aqyarda episi olıp 52 977 adam koronavirusqa oğrağan, bugüngece 50 267 tüzelgen, 1852 vefat etken.
Yanvarnıñ 4-nde haber etilgenine köre, Aqyarda 59 yañı hasta qayd etildi, 3 adam öldi.
Qırımda tünevin 79 yañı koronavirus adisesi qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
