Aprelniñ 4-nde saba Aqyarda yañı koronavirus hastaları qayd etilmedi, dep bildire Rusiye kontrolindeki Aqyar ükümeti. Amma yuqunç tarqaluv telükesi sebebinden közetüv altında bulunğan insanlarnıñ sayısı bir qaç on insanğa arttı.
Aqyarnıñ Rusiye ükümeti saytında derc etilgen malümatqa köre, şeerniñ yuqunç hastahanesinde 27 insan buluna, 1606 kişi yaşağan yerinde közetüv altında qala.
«Yılnıñ başından berli 4436 insan közetildi, karantin müddeti bitkeninen 2839 kişi közetüvden çıqarıldı», – dep qayd etile.
Aprelniñ 3-nde olğan malümatqa köre, yuqunç hastahanesinde 29 hasta buluna, 1526 kişi yaşağan yerinde közetüv altında qala. Şimdilik şeerde 5 koronavirus hastası qayd etildi.
Bundan evel Aqyar sakinlerine Acele bir şey olmağanda evden çıqmağa yasaq etildi. Aqyarda yahta ve katerlernen deñiz kezintileri de yasaqlandı, şeer kirişlerinde blokpostlar qoyuldı. Şeer akimiyeti, aprelniñ 2-nden itibaren şeerde özüni tecrit etüv rejimini bozğanlarğa ceza berilecek, dep ilân etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
