Aqyarda fevralniñ 23-nde saba 65 yañı COVID-19 hastası qayd etildi, tüzelgen 57 kişi yiberildi, eki insan vefat etti, dep haber ete şeerniñ Rusiye ükümeti.
Akimiyetniñ malümatına köre, 38 yaştan 84 yaşqa qadar eki insan vefat etti. «Ekisiniñ de hronik hastalıqları bar edi. Umumen Aqyarda 11632 insan yañı koronavirus yuqunçına oğradı. 10486 insan tüzeldi, 477 kişi vefat etti», – dep aytıla haberde.
Berilgen malümatqa köre, bugünki künde şeer hastahanelerinde COVID-19 tasdıqlanğan 264 insan buluna, alı ağır olmağanlar bölüginde 22 insan yata, 648 kişi közetile.
Keçken künü Qırımda 79 koronavirus hastası qayd etildi. Umumen 35395 COVID-19 hastası qayd etildi. Tüzelgen 31071 insan yiberildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
