Avgustnıñ 14-nde saba Aqyarda yedi yañı COVID-19 hastası qayd etildi. Şeerniñ Rusiye ükümeti bildirgenine köre, hastalanğanlar Aqyar sakinleri ola.
«Er biri daa evel hastalanğan soyünen alâqada oldı», – dep aytıla haberde.
Akimiyetniñ malümatına köre, al-azırda 56 insan hastahanede buluna, 167 insan yuqunç hastahanesinde közetile, №9 şeer hastahanesinde 137 insan yata, 462 kişi yaşağan yerinde közetile.
Yılnıñ başından Aqyarda 408 insan yañı koronavirus yuqunçına oğradı, 326 kişi tüzeldi, 12 insan vefat etti.
Keçken künü Qırımda 27 koronavirus hastası qayd etildi. Umumen Qırımda, yerli akimiyetniñ malümatına köre, 1664 yañı koronavirus hastası qayd etildi, 83-ü çetelden keldi, 112-si qomşu Rusiyeden kelgenler ve olarnen alâqada olğanlar. 1162 kişi tüzeldi, 19 hasta koronavirustan vefat etti. Aqyarda yılnıñ başından 401 insan yañı koronavirus yuqunçına oğradı, 325 insan tüzeldi, 12 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
