Aqyarda iyülniñ 7 sabasına qadar beş yañı COVID-19 hastası qayd etildi, aralarında doquz yaşında bala bar. Şeerniñ Rusiye ükümeti bildirgenine köre, insanlar daa evel hastalanğanlarnen alâqada oldı.
Akimiyetniñ malümatına köre, bugünki künde 137 insan yuqunç hastahanesinde közetile, 89 kişi №9 şeer hastahanesinde buluna. 992 insan yaşağan yerinde közetile.
Yılnıñ başından Aqyarda 254 insan yañı koronavirus yuqunçına oğradı. Al-azırda 43 kişi hastahanede buluna. 198 insan tüzeldi, 5 kişi vefat etti.
Şeerde «İzumrud» ve «Solnışko» pansionatları observator rejiminde çalışa.
Keçken künü Qırımda 28 koronavirus hastası qayd etildi. Umumen Qırımda 789 yañı koronavirus hastası qayd etildi. 38-i çetelden keldi, 95-i qomşu Rusiyeden kelgenler ve olarnen alâqada olğanlar. 578 insan tüzeldi, 31 kişi vefat etti (11-i COVID-19-dan). Aqyarda 249 insan yañı koronavirus yuqunçına oğradı, 193 kişi yahşı oldı, 5 insan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
