Noyabrniñ 10-nda saba Aqyarda 71 yañı COVID-19 hastası qayd etildi. Daa 35 hasta yuqunç ve doquzıncı şeer hastahanelerine alındı, qalğanları ambulator tedaviylevde buluna, dep haber ete şeerniñ Rusiye ükümeti.
«Hastalar – sekiz yaşından 85 yaşına qadar yerli sakinler. 64 kişi tüzelgen soñ hastahaneden çıqarıldı. Yılnıñ başından Aqyarda 3190 insan yañı koronavirus yuqunçına oğradı. 2068 kişi tüzeldi, 79 insan vefat etti», – dep aytıla haberde.
Akimiyetniñ malümatına köre, COVID-19 diagnozı tasdıqlanğan 345 insan Aqyar hastahanelerinde buluna: 175-i – yuqunç hastahanesinde, 168-i – doquzıncı şeer hastahanesinde, ekisi – Mudafaa nazirliginiñ hastahanesinde, 672 kişi ambulator tedaviylevde buluna.
«617 insan közetile – hastalarnen alâqada olğan, amma COVID-19 diagnozı tasdıqlanmağan insanlar», – dep aytıla haberde.
Keçken künü Qırımda 141 koronavirus hastası qayd etildi. Qırımnıñ Rusiye Sağlıq nazirliginiñ soñki malümatına köre, epidemiya vaqtında 170 hasta vefat etti, 6813 kişi tüzeldi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
