Oktâbrniñ 15-i sabasına Aqyarda 35 yañı COVID-19 hastası qayd etildi. Bu aqta şeerniñ Rusiye ükümetiniñ matbuat hızmeti bildire.
«Hastalar – altı aydan 80 yaşına qadar yerli sakinler. 91 yaşında er adamı ve 94 yaşında qadın vefat etkenler. Ekisiniñ de hronik hastalıqlarınen beraber eki taraflı virus-bakterial pnevmoniyası, keskin nefes yetmemezligi oldı», – dep aytıla haberde.
Akimiyetniñ malümatına köre, yılnıñ başından Aqyarda 1452 insan yañı koronavirus yuqunçına oğradı, 965 kişi tüzeldi, 44 insan vefat etti.
Şeerniñ yuqunç hastahanesinde 309 insan közetile, №9 şeer hastahanesinde 227 kişi buluna, 415 insan yaşağan yerde közetile.
Qırımda bir künde qayd etilgen COVID-19 hastalarında yañı antirekord oldı. Qırımda, akimiyetniñ malümatına köre, 6502 yañı koronavirus hastası qayd etildi. 3721 insan tüzeldi, 99 insan koronavirustan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
