Oktâbrniñ 13-nde saba Aqyarda 30 yañı COVID-19 hastası qayd etildi, dep haber ete şeerniñ Rusiye ükümeti. Akimiyetniñ malümatına köre, hastalar – 25 yaşından 82 yaşına qadar yerli sakinlerdir.
«Eki er adamı vefat etti: 56 ve 83 yaşında. Ekisiniñ de hronik hastalıqlarınen beraber eki taraflı virus-bakterial pnevmoniyası, keskin nefes yetmemezligi oldı», – dep aytıla haberde.
Yılnıñ başından Aqyarda 1385 insan yañı koronavirus yuqunçına oğradı, 911 kişi tüzeldi, 41 hasta koronavirustan vefat etti.
Yerli akimiyetniñ malümatına köre, al-azırda 353 insan hastahanede buluna, 293 kişi yuqunç hastahanesinde közetile, №9 şeer hastahanesinde 243 insan buluna, 401 insan yaşağan yerde közetile.
Qırımda bir künde 158 koronavirus hastası qayd etildi, eki hasta vefat etti. Umumen, yerli akimiyet malümatına köre, Qırımda 6168 yañı koronavirus hastası qayd etildi. 107-si çetelden keldi, 128-i qomşu Rusiyeden kelgenler ve olarnen alâqada olğanlar. 3533 insan tüzeldi, 93 hasta vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
