İyünniñ 18-i sabasına Aqyarda dört yañı COVID-19 hastası qayd etildi, dep bildire şeerniñ Rusiye ükümeti.
«Üç hasta bir qorantadan: ana ve qızı yuqunç hastahanesine alınğan edi, şimdi aqayı, oğlu ve qomşusınıñ testi müsbet çıqtı. Daa bir insan daa evel qayd etilgen hastanen alâqada olğan edi», – dep aytıla haberde.
Yerli akimiyetniñ malümatına köre, daa eki insan yahşı olıp hastahaneden çıqarıldı.
«Bugünki künde 89 insan yuqunç hastahanesinde közetile, 86 kişi – №9 şeer hastahanesinde. 717 insan yaşağan yerinde közetüv altında buluna. İyünniñ 17-nde keçiş noqtalarında ve tren vokzalında 718 insannıñ testi yapıldı», – dep qoşmı Aqyarnıñ Rusiye ükümeti.
Akimiyetniñ malümatına köre, yılnıñ başından Aqyarda 195 insan yañı koronavirus yuqunçına oğradı. Al-azırda 22 insan hastahanede buluna. 163 insan yahşı oldı, 3 kişi vefat etti.
Keçken künü Qırımda bir koronavirus hastası qayd etilmedi, dep bildire Qırımnıñ Rusiye yolbaşçısı Sergey Aksenov. Keçken künü Qırımda eki COVID-19 hastası vefat etti.
Onıñ malümatına köre, Qırımda 575 yañı koronavirus hastası qayd etildi. 36-sı çetelden keldi, 90-ı qomşu Rusiyeden kelgenler ya da olarnen alâqada olğanlardır. 389 insan tüzeldi, 20 COVID-19 hastası vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
