Aqyarda yanvarniñ 11-nde saba 95 yañı COVID-19 hastası qayd etildi. 48 yaştan 82 yaşqa qadar dört insan vefat etti. Episiniñ ağır hronik hastalığı bar edi, dep bildirdi şeerniñ Rusiye ükümeti.
Akimiyetniñ malümatına köre, bir künde 40 insan tüzelgen soñ çıqarıldı, umumen pandemiya vaqtında Aqyarda 7753 kişi yañı koronavirus yuqunçından vefat etti. 7007 kişi tüzeldi, 287 insan vefat etti.
«Bugünki künde COVID-19 diagnozı tasdıqlanğan 267 insan hastahanelerde buluna. Yengil hastalar bölüginde 263 kişi yata. 526 insan közetile – bu insanlar hastalarnen alâqada oldı, amma COVID-19 diagnozları tasdıqlanmadı», – dep aytıla haberde.
Keçken künü Qırımda 202 koronavirus hastası qayd etildi, 6 hasta vefat etti. Qırımda pandemiya vaqtında 597 kişi koronavirustan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
