Noyabrniñ 3-nde saba Aqyarda 78 yañı COVID-19 hastası qayd etildi, dep bildire Aqyarnıñ Rusiye ükümeti.
«37 hasta yuqunç ve doquzıncı şeer hastahanelerine alındı, 41 insan ambulator tedaviylevde buluna. Hastalar – 18 yaşından 72 yaşına qadar yerli sakinler. 52 kişi tüzelgen soñ hastahaneden çıqarıldı», – dep aytıla haberde.
Akimiyetniñ malümatına köre, 68 ve 79 yaşında eki er adamı vefat etti.
«Yılnıñ başından Aqyarda 2635 insan yañı koronavirus yuqunçına oğradı. Al-azırda 1657 kişi tüzeldi, 71 insan vefat etti. COVID-19 diagnozı tasdıqlanğan 295 insan hastahanede buluna: 162 insan yuqunç hastahanesinde, 134 kişi – doquzıncı şeer hastahanesinde, bir kişi Mudafaa nazirliginiñ hastahanesinde», – dep aytıla müessise haberinde.
Qayd etilgenine köre, 627 insan közetile – hastalarnen alâqada olğan insanlar, COVID-19 diagnozı tasdıqlanmadı.
Keçken künü Qırımda 139 koronavirus hastası qayd etildi, 67-siniñ hastalıq alâmetleri yoq, dep bildirdi Qırımnıñ Rusiye yolbaşçısı Sergey Aksenov. Qırımnıñ Rusiye sağlıq nazirliginiñ soñki malümatına köre, pandemiya vaqtında Qırımda 142 hasta koronavirustan vefat etti. 5657 kişi tüzeldi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
