Dekabrniñ 3-ü sabasına Aqyarda 72 yañı COVID-19 hastası qayd etildi. 36 kişi yuqunç, doquzıncı ve birinci şeer hastahanelerine alındı, qalğanlarnı ambulator tedaviylevde buluna, dep bildire şeerniñ Rusiye ükümeti.
«Hastalar – beş yaşından 90 yaşına qadar insanlar. 101 kişi tüzelgen soñ yiberildi. 74 ve 79 yaşlarında er adamları ve 73 yaşında qadın vefat etkenler», – dep aytıla haberde.
Akimiyetniñ malümatına köre, yılnıñ başından Aqyarda 4549 insan yañı koronavirus yuqunçına oğradı, 4101 kişi tüzeldi, 129 insan vefat etti.
COVID-19 diagnozı tasdıqlanğan 143 kişi hastahanede, 150 insan ambulator tedaviylevde buluna, 540 kişi közetile.
Qırımda keçken künü 244 koronavirus hastası qayd etildi. Umumen pandemiya vaqtında Qırımda 16063 COVID-19 hastası qayd etildi, 12224 kişi tüzelgen soñ çıqarıldı, 307 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
