Dekabrniñ 1-nde saba Aqyarda 62 yañı COVID-19 hastası qayd etildi. Üç koronavirus hastası vefat etti, dep bildire şeerniñ Rusiye ükümeti.
«Altı insan yuqunç ve doquzıncı şeer hastahanelerine alındı, qalğanları ambulator tedaviylevde buluna. Hastalar – bir yaşından 82 yaşına qadar insanlar. 107 kişi tüzelgen soñ çıqarıldı», – dep aytıla haberde.
Akimiyetniñ malümatına köre, 68 ve 72 yaşında eki er adamı ve 90 yaşında qadın vefat etkenler.
Umumen yılnıñ başından Aqyarda 4408 insan yañı koronavirus yuqunçına oğradı, 3896 kişi tüzeldi, 123 insan vefat etti.
«Bugünki künde COVID-19 diagnozı tasdıqlanğan 148 kişi hastahanede buluna, 118 – «İzumrudda». 215 insan ambulator tedaviylevde buluna. 534 kişi közetile – bu insanlar hastalarnen alâqada oldı, amma olarda COVID-19 tasdıqlanmadı», – dep bildire şeer ükümeti.
Keçken künü Qırımda 214 koronavirus hastası qayd etildi. Umumen 15586 COVID-19 hastası qayd etildi. 11609 kişi tüzelgen soñ yiberildi. 293 hasta vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
