Oktâbrniñ 6-nda saba Aqyarda 29 yañı COVID-19 hastası qayd etildi, daa üç koronavirus hastası vefat etti. Bu aqta Rusiye kontrolindeki şeer ükümeti haber ete.
«Hastalar – 18 yaşından 85 yaşına qadar insanlar, episi – yerli sakin. Üç insan vefat etti: 64 ve 83 yaşında eki er adamı ve 82 yaşında qadın. Er biriniñ hronik hastalıqlarnen beraber ağır pnevmoniyası oldı», – dep aytıla haberde.
Yılnıñ başından Aqyarda, akimiyetniñ malümatına köre, 1164 insan yañı koronavirus yuqunçına oğradı, 727 kişi tüzeldi, 32 insan vefat etti.
«Al-azırda 347 kişi hastahanede buluna, 274 kişi yuqunç hastahanesinde közetile, 236 kişi №9 şeer hastahanesinde qala. 409 kişi yaşağan yerde közetile», – dep qoştı müessise.
Qırımda keçken künü 107 koronavirus hastası qayd etildi. Umumen Qırımda, yerli akimiyetniñ malümatına köre, 5170 yañı koronavirus hastası qayd etildi. 107-si çetelden keldi, 128-i qomşu Rusiyeden kelgenler ve olarnen alâqada olğanlar, bu müddet devamında 3068 insan yahşı oldı. Yılnıñ başından Aqyarda 1135 insan yañı koronavirus yuqunçına oğradı, 711 kişi tüzeldi, 29 insan vefat etti.
Umumen Qırımda, yerli akimiyetniñ malümatına köre, 5063 yañı koronavirus hastası qayd etildi. 107-si çetelden keldi, 128-i qomşu Rusiyeden kelgenler ve olarnen alâqada olğanlar, 3008 insan tüzeldi, 69 hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
