Aqyarda fevralnıñ 3-nde 103 yañı koronavirus hastası qayd etilgen, aynı zamanda 101 kişi tüzelgen soñ hastahaneden çıqarılğan. Bu aqta Rusiye nezaretinde olğan şeer memuriyetiniñ matbuat hızmeti haber ete.
“Bir künde 34 yaştan 91 yaşqa qadar beş kişi öldi. Bütün allarda, hastalıqnıñ ketişatı sürekli hastalıqlar ile ağırlaştı”, – dep yazıla bildirmede.
Pandemiya başlağanından berli Aqyarda 10 108 kişi hastalanğan.
“Şimidiki vaqıtta 9053 hasta tedaviylendi ve 409 öldi. Bugünde, COVID-19 diagnozı tasdıqlanğan 403 insan hastahanelerde yata, alı yengil hastalar bölüginde 79 kişi buluna, 607 adam közetile” – dep qayd ettiler matbuat hızmetinden.
Hatırlatamız ki, Qırımda keçken künü 148 yañı koronavirus hastası qayd etildi. Bir künde koronavirus yuqunçından 8 hasta öldi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
